Tlaocolxochi ixayoticaya ic nichuipana in nocuic nicuicani,
niquimilnamiqui in tepilhuan,
in teintoque,
in tlaçotitoque in campa in ximohuaya,
in oteuctico, in otlatocatico in tlallia icpac,
in quetzalhuahuaciuhtoque in chalchiuhteintoque in tepilhuan,
in maoc imixpan in maoc oquitlani;
in ye itto in tlalticpac iximachoca in tloque in nahuaque.
Y yo ya hue nitlaocolcuicaya in niquimilnamiqui in tepilhuan,
ma zan itla ninocuepa,
ma niquimonana,
ma niquinhualquixti in ompa in ximoayan,
ma oc oppa tihua in tlalticpac,
ma oc quimahuizoqui in tepilhuan in ticmahuizoa,
azo huel yehuantin tlatlazomahuizozquia in ipalnemohualoni,
quemmach tomazehual in tlazaniuh ticmatican in ticnopillahueliloque ic choca in noyollo nino tlalnamiquiliz huipana in nicuicani choquiztica tlaocoltica nitlalnamiquia.
Manozo zan nicmati in nechcaquizque intla itla yectli cuicatl niquimehuili in ompa ximohuayan,
ma ic niquipapacti,
ma ic niquimacotlaza inin tonez inin chichinaquiliz in tepilhuan.
Cuix on machiaz?
Quennel nihualnellaquahua?
Aquen manian ompa niquimontocaz?
Ano niquin nonotztaciz in ye yuh quin in tlalticpac.
No comments:
Post a Comment